Сүүлийн жилүүдэд орон нутгийн Цэвэрлэх байгууламж ачааллаа даахаа больсон. Тиймээс Польш улсын Засгийн газрын хөнгөлөлттэй зээлийн хөрөнгөөр Увс, Завхан, Баян-Өлгий, Говьсүмбэр, Дорнод зэрэг 5 аймагт цэвэрлэх байгууламж барихаар болсон.
Мөн сонгогдсон төслийн гүйцэтгэгч байгууллагууд байгууламжуудын ашиглалтад орох хугацааг хойшлуусан тохиолдолд хариуцлага тооцох заалтыг гэрээнд тусгаж өгчээ.
Дээрх таван аймагт ашиглаж байгаа цэвэрлэх байгууламжуудын хувьд хэдийн ашиглалтаас гарсан гэхэд хилсдэхгүй бөгөөд одоогоор бохироо 100 хувь байгальд хаяж байгаа талаар албаны хүмүүс мэдээлж байсан юм. Тэгвэл шинээр ашиглалтад оруулах цэвэрлэх байгууламжууд ойрын 10 жилдээ саад тотгоргүй ажиллах бүрэн боломжтой гэдгийг онцоллоо. Түүнээс гадна цэвэрлэх байгууламжаас цэвэршүүлж гаргасан саарал усыг дахин ашиглахаас гадна лагийг боловсруулан ашиглахаар төлөвлөжээ.
Дээрх 5 аймгийг аймгийн хүн амын өсөлт, усны хэрэглээ зэргийг үндэслэн сонгосон ч цэвэрлэх байгууламжийг шинэчлэх шаардлагатай дахин таван аймаг байгааг албаныхан онцолсон юм.
